Uchaguzi UVCCM Arusha ni vurugu tupu

VURUGU na mizengwe vimeendelea kuandama uchaguzi ndani ya CCM, baada ya Katibu wa CCM mkoani Arusha, Mary Chatanda kunusurika kupigwa katika uchaguzi wa Jumuiya ya Umoja wa Vijana wa CCM (UVCCM). Katibu huyo alinusurika kipigo baada ya kutuhumiwa kutaka kuuvuruga uchaguzi huo wa kumpata mwenyekiti wa vijana mkoa. Baadhi ya wajumbe wa mkutano huo walimtuhumu Chatanda kuwa alitaka kuuvuruga ili ampitishe  mgombea ambaye ni chaguo lake aliyetajwa kwa jina la Dk Harold Adamson.  Katika vurugu hizo, Chatanda alinusurika kupigwa na wajumbe waliotoka Wilaya ya Monduli ambao walitaka uchaguzi urudiwe ili haki itendeke. Dalili za kuibuka kwa vurugu zilianza kujitokeza mapema baada ya makundi ya baadhi ya vigogo wa CCM yanayohusishwa na Waziri Mkuu Mstaafu, Edward Lowassa na Waziri wa Mambo ya Nje, Bernad Membe kutambiana nje ya ukumbi wa mkutano.