BANDA ATUPWA MBALI UCHAGUZI NCHINI MALAWI

Matokeo ya mwisho ya uchaguzi mkuu nchini Malawi yametangazwa. Tume ya uchaguzi ya nchi hiyo imemtangaza Peter Mutharika, kaka wa rais aliyefariki dunia, Bingu wa Mutharika, wa chama cha Democratic kuwa ndiye Rais mpya wa nchi hiyo. Kwa mujibu wa matokeo hayo, Peter Mutharika ameshinda katika uchaguzi huo kwa kujipatia asilimia 36.4 ya kura huku Lazarus Chakwera, kiongozi wa chama cha Congress ya Malawi akipata asilimia 27.8. 

Aidha tume hiyo ya uchaguzi imemtaja Rais Joyce Banda wa nchi hiyo kuwa, amepata asilimia 20.2 ya kura hizo. Matokeo hayo yametolewa katika hali ambayo, mahakama kuu ya nchi hiyo imetangaza kupinga kucheleweshwa matokeo ya uchaguzi huo wa Mei 20 mwaka huu. Hayo yanajiri katika hali ambayo jana mamia ya watu walifanya maandamano huko Lilongwe, mji mkuu wa nchi hiyo, wakitaka kuhesabiwa upya kura za uchaguzi huo na kupinga matokeo hayo. Hivi karibuni Rais Joyce Banda wa Malawi alisema kuwa, yupo tayari kuondoka madarakani iwapo mahakama kuu ya nchi hiyo itaamua hivyo. Bado haijafahamika kama mahakama hiyo itakubaliana na matokeo hayo ya uchaguzi, au itaamua kufuata madai ya Bi. Banda katika kadhia hiyo.