WANAWAKE WAWILI WAMWAGIWA ACID USONI HUKO KISIWANI ZANZIBAR...

Polisi katika kisiwa cha Zanzibar wamebainisha kuwa wanawake wawili wa Uingereza wamerushiwa maji ya Acid katika nyuso zao baada ya kuvamiwa  usiku wa kuamkia leo.

Naibu kamishna wa polisi amesema kuwa wanaume wawili waliwatendea kitendo hicho wanawake hao Katie Gee na Kirstie Trup, wote wenye umri wa miaka 18 kutoka London, walipokuwa wakitembea katika barabara za mji wa kihistoria wa zanzibar.

Wanawake hao ni walimu wa kujitolea wakifanya kazi kisiwani humo

Amesema kuwa polisi tayari wameanzisha msako dhidi ya wanaume hao.

Katika taarifa yake shirika la usafiri la i-to-i nchini Uingereza lilisema kuwa wanawake hao wameondoka hospitalini.

Polisi wanasema kuwa wanawake hao wenye umri wa miaka 18 walikuwa wakitembea katika mji wa Mawe kisiwani Zanzibar ambao ni kivutio kikuu cha utalii kisiwani humo, wakati wanaume wawili waliokuwa wamepanda piki piki walipowamwagiwa Acid kwenye mikono , vifua na nyuso zao.

Wanawake hao walipelekwa kwa ndege hadi Dar es Salaam ambako walipokea matibabu . Afisa wa wizara ya afya amesema kuwa majeraha yao sio makubwa sana ambayo yanaweza kuhatarisha maisha yao.

Polisi wa Zanzibar wamesema ni mara ya kwanza kwa raia wa kigeni kushambuliwa kwa namna hiyo na kwamba wanawasaka wahusika.

Chanzo BBC