HIZI NI BAADHI YA TIMU ZITAKAZOSHIRIKI MICHUANO YA AFCON

Afrika kusini inawania taji lake la pili

Baada ya Libya kutumbukia katika vita vya wenyewe kwa wenyewe, shirikisho la soka barani Afrika liliamua mwaka jana kuwa fainali za mwaka 2013 zifanyike nchini Afrika kusini. Timu ya nchi hiyo kama inavyojulikana "Bafana Bafana", inaweza kutwaa taji hilo kwa mara ya pili baada ya kuwa mabingwa mwaka 1996. Afrika kusini imo katika kundi A pamoja na Angola, Cape Verde na Morocco.

Mabingwa watetezi Zambia

 

Ushindi wa kushangaza wa Zambia katika fainali za kombe la Afrika mwaka 2012 si rahisi kuusahau haraka. Zambia iliishinda Cote d'Ivoire kwa mabao 8-7 kwa njia ya penalti baada ya timu hizo kutoka sare katika dakika za kawaida. Zambia inacheza katika kundi C ambalo lina timu za Nigeria, Burkina Faso na Ethiopia.

Côte d'Ivoire

Côte d'Ivoire inakwenda katika fainali hizo nchini Afrika kusini ikiwa ni makamu bingwa. Côte d'Ivore imeishinda Senegal katika awamu ya kufuzu katika makundi. Mjini Dakar baada ya Côte d'Ivoire kuongoza kwa mabao 2-0, kulizuka ghasia na mchezo kuvunjika. Senegal iliondolewa. Côte d'Ivoire inacheza katika kundi D pamoja na Tunisia, Algeria na Togo.

 

 Angola

Kwa mara ya saba Angola imefanikiwa kucheza katika fainali za kombe la Afrika. Timu hiyo inayofahamika kama "Palancas Negras", ilifanikiwa kwa kuiondoa Zimbabwe kwa mabao 3-1 katika mchezo wa kwanza na kuiadhibu Zimbabwe tena kwa mabao 2-0 nyumbani mjini Luanda. Magoli yote mawili yalifungwa na mshambuliaji Manucho (kulia).

Angola

Mashabiki wa Angola wameonyesha matumaini kuwa timu yao (pichani) itafanikiwa kuvuka kikwazo cha duru ya kwanza. Wanahisi kuwa ushindi unawezekana dhidi ya wenyeji Afrika kusini, Morocco na Cape Verde. Kocha wa Angola, raia wa Uruguay, Gustavo Ferrín, kwa upande wake analiona kundi A kuwa gumu zaidi.

Cape Verde

 

Wacape Verde wanajisikia fahari na kikosi chao cha "Nyangumi wa Buluu", ama kama wanavyofahamika nchini humo "Tubarões Azuis". Kwa mara ya kwanza nchi hiyo inashiriki katika mashindano makubwa ya kimataifa. Januari 19 Cape Verde itafungua dimba la fainali hizo dhidi ya wenyeji Afrika kusini mjini Johannesburg.

Ghana

 

Mara nne Ghana imekuwa mabingwa wa Afrika. Mara nane timu hiyo ya Afrika magharibi imejikuta katika fainali. Mara ya mwisho ilikuwa nchini Angola mwaka 2010. Ghana ilishindwa na Misri kwa bao 1-0. Mchezaji maarufu katika timu hiyo alikuwa mchezaji wa kati André Ayew (kulia) kutoka Olympique Marseille. Ghana imo katika kundi B pamoja na Mali, Niger na Jamhuri ya kidemokrasi ya Congo.